Ionaid Tacaiochta Teaghlaigh
Tá an réimse seo riachtanach do thodhchai na Gaeilge, sa Ghaeltacht ach go háirithe. Chuirfeadh na hIonaid seo seirbhísí tacaíochta ar fáil do theaghlaigh a dteastíonn uathu a gcuid leanaí a thógáil le Gaeilge nó do theaghlaigh nach labhraíonn an Ghaeilge go hiondúil sa bhaile ach a thuigeann an tábhacht a bhaineann leis an tréimse is luaithe i saol an linbh i bhforbairt scileanna teangeolaíochta agus a dteastíonn uathu go mbeadh caighdeán an chainteora dúchais acu ón tús.
Chun freastal ar na riachtanais seo, ba mhaith leis an bhFondúireacht Ionaid Tacaíochta Teaghlaigh a fhorbairt agus chuirfeadh na hIonaid na seirbhísí seo a leanas ar fáil do theaghlaigh:
- Seirbhís Naíolainne Gaeilge.
- Seirbhís Naíonra.
- Seirbhís cúram iarscoile.
- Teacht le chéile do thuismitheoirí le páistí óga.
- Seirbhís chomhairleach do lánúineacha nua atá ag smaoineamh ar a bpáistí a thógáil le Gaeilge.
- Seirbhís chomhairleach agus tacaíochta teanga do thuismitheoirí atá ag tógáil a bpáistí le Gaeilge nó ar mian leo teanga an teaghlaigh a iompú ó Bhéarla go Gaeilge. Cuimseoidh an tseirbhís seo cuairteanna baile ó chomhairleoirí teanga.
- Ranganna Gaeilge do thuismitheoirí.
- Teagmháil le heagraíochtaí eile sa cheantar agus sa réigiún a chuireann seirbhísí ar fáil do theaghlaigh agus do leanaí.
- Teagmháil le grúpaí tuismitheoirí in áiteanna eile, sa Ghaeltacht agus lasmuigh di, atá ag tógáil a bpáistí le Gaeilge nó le mionteanga eile.
- Seirbhísí tacaíochta teaghlaigh eile ar a n-áirítear, mar shampla, seirbhísí ón mBord Sláinte agus cúrsaí do thuismitheoirí.
Ba chóir na tréithe seo a leanas a bheith ag gach ionad:
- Go mbeadh an fhoireann lán cháilithe, foireann na Naíolainne agus an Naíonra ach go háirithe agus go mbeadh eolas agus tuiscint acu ar an tábhacht a bhaineann le luathoideachas an linbh
- Go mbeadh sárchumas Gaeilge ag an bhfoireann
- Go mbeadh an t-ionad féin feiliúnach agus fairsing chun na críche atá i gceist.
- Go mbeadh sé lonnaithe i suíomh atá oiriúnach ó thaobh cúrsaí tráchta agus taistil agus go mbeadh spás páirceála dóthaineach mar chuid den suíomh.
- Go gcuirfí riachtanais leanaí a bhfuil riachtanais speisialta acu san áireamh i ndearadh agus i leagan amach na n-áiseanna/seomraí a bheidh ann.
- Go mbeadh áiseanna/seomraí san ionad atá deartha chun críche sainiúla, ar a n-áirítear forbairt scileanna ceardaíochta, ceoil agus ríomhaireachta.
- Go mbeadh siad lonnaithe gar do sheirbhísí eile atá ar fáil trí Ghaeilge-scoileanna ach go háirithe.
- Go mbeadh comhaontú ann leis na scoileanna sin go dtabharfaí aitheantas ar leith do leanai a bhfuil an teanga ar a dtoil acu ag teacht isteach chun na scoile dóibh
Téigh ar ais go Tionscadal
